კოსტა-რიკის მცხოვრები შესაძლოა მსოფლიოში ყველაზე ხანდაზმულ ადამიანად აღიარონ

კაცი თავის ხანგრძლივ სიცოცხლეს საკმაოდ უბრალო რამეებს უნდა უმადლოდეს.

კოსტა-რიკაში ოფიციალური პირები ცდილობენ ოფიციალურად დაადასტურონ ადგილობრივი 100 წელს გადაცილებული ადამიანის ასაკი, რომელსაც შესაძლოა მსოფლიო რეკორდის დამყარების უფლება ჰქონდეს.

ხოსე ფლორესი 119 წლისაა. მისი პირადობის დამადასტურებელი დოკუმენტის თანახმად, კაცი 1907 წლის 11 ივლისს დაიბადა. თუ ეს ინფორმაცია გადამოწმებას გაივლის, მას შესაძლოა მსოფლიოში ყველაზე ხანდაზმული ცოცხალი ადამიანის ტიტული მიენიჭოს, იუწყება როიტერი.

რეკორდი ამჟამად ბრიტანელ ქალს, ეთელ კეტერჰემს, ეკუთვნის. აგვისტოში ის 117 წლის გახდა.

ფლორესის ასაკის დასადასტურებლად სპეციალისტები იკვლევენ მის დაბადებისა და ნათლობის მოწმობებს, ასევე სხვადასხვა წლის სხვა დოკუმენტებს.

დასკვნები საერთაშორისო ორგანიზაციების, მათ შორის Guinness World Records-ის, წარმომადგენლებმა უნდა გამოაქვეყნონ.

ხოსე ნიკოიას ნახევარკუნძულზე, სარდინალში ცხოვრობს. ეს მსოფლიოს ხუთი „ლურჯი ზონიდან“ ერთ-ერთია — ადგილებიდან, სადაც ადამიანები უფრო დიდხანს ცხოვრობენ და ხშირად 100 წლის ასაკსაც აღწევენ.

ადგილობრივი მცხოვრებლები ხანგრძლივ სიცოცხლეს რამდენიმე ფაქტორს მიაწერენ. ისინი სვამენ კალციუმითა და მაგნიუმით მდიდარ წყალს, ბევრ სიმინდსა და პარკოსანს მიირთმევენ, ბევრ ფიზიკურ სამუშაოს ასრულებენ და ნათესავებთან მჭიდრო კავშირებს ინარჩუნებენ.

ამ ყველაფრის დიდი ნაწილი ფლორესის ცხოვრების წესსაც შეესაბამება. მთელი ცხოვრება სოფლად მუშაობდა და დიდი ოჯახიც ჰყავს: რვა შვილი, 23 შვილიშვილი, 25 შვილთაშვილი და ერთი შვილთაშვილის შვილი.

ამჟამად კოსტა-რიკელი 100 წელს გადაცილებული ადამიანის ყოველდღიური ცხოვრება მშვიდი და აუჩქარებელია. მას სიამოვნებს თავისი ცხოვრების ამბების გახსენება, ხუმრობა და ზოგჯერ შვილიშვილთან მკლავჭიდშიც კი ეჯიბრება.