დედამიწაზე დაკვირვებების ისტორიაში ყველაზე ცხელი აგვისტო დაფიქსირდა — WMO
ახლახან გამოქვეყნებული მეტეოროლოგიური მონაცემების თანახმად, აგვისტო წელს დაკვირვებების ისტორიაში ყველაზე ცხელი იყო. ამის შესახებ მსოფლიო მეტეოროლოგიურმა ორგანიზაციამ /WMO/ პარასკევს განაცხადა და აღნიშნა, რომ შედეგები მთელ პლანეტაზე იგრძნობოდა.
ჩრდილოეთ ნახევარსფეროში ყველაზე თბილი ზაფხული დაფიქსირდა, ხოლო სამხრეთ ნახევარსფეროში ზამთრის ტემპერატურა რეკორდულ მაჩვენებელს მიუახლოვდა. ამასთან, არქტიკასა და ანტარქტიდაში ზღვის ყინულის ფართობი აგვისტოში საშუალო მაჩვენებელზე ნაკლები იყო.
აგვისტოში დასავლეთ ევროპაში ინტენსიური სიცხის პერიოდები დაფიქსირდა, რაც მაისში დაწყებული ექსტრემალური ტემპერატურული მოვლენების სერიას აგრძელებდა. სერიოზული გვალვა დაფიქსირდა საფრანგეთში, უნგრეთში, რუმინეთში, სერბეთსა და გაერთიანებულ სამეფოში.
იმავე თვეში ფართომასშტაბიანი გვალვა ცენტრალური და აღმოსავლეთ ევროპის დიდ ნაწილშიც დაფიქსირდა და ზოგიერთ შემთხვევაში მაისიდან გრძელდებოდა. ევროპის მთავარი მდინარეების, მათ შორის რაინის, დუნაის, სამხრეთის ბუგისა და დნეპრის, წყლის დონე უჩვეულოდ დაბალი იყო.
WMO-ს თანახმად, დაკვირვებების ისტორიაში ყველაზე ცხელი აგვისტოების ათივე შემთხვევა 2016 წლის შემდეგ დაფიქსირდა.
კომენტარის დამატება