ავსტრალიის წითელი ნიადაგის ქვეშ „ოქროს ძარღვი“ აღმოაჩინეს

საკმარისი იქნება ერთზე მეტი თაობის მოთხოვნილებების დასაკმაყოფილებლად.

დღეს მთელი მსოფლიო კონცენტრირებულია წყალბადის ბუნებრივი წყაროების მოძიებაზე, რომლებსაც კაცობრიობის დაბალნახშირბადიან ენერგეტიკულ მომავალზე გადასვლის დაჩქარება შეეძლებათ. წყალბადი განსაკუთრებით სუფთა საწვავია, თუმცა მისი უმეტესი ნაწილი კვლავ წიაღისეული ენერგიის წყაროებიდან იწარმოება. როგორც ScienceAlert წერს (თარგმნა Focus-მა), მეცნიერებმა ახლახან, როგორც ჩანს, ავსტრალიის წითელი ნიადაგის ქვეშ „ოქროს საბადო“ აღმოაჩინეს.

მეცნიერები მიიჩნევენ, რომ წყალბადის ვრცელი ბუნებრივი მარაგების ხელმისაწვდომობამ ამ პრობლემის გადაჭრას შეიძლება შეუწყოს ხელი. მონაცემები მიუთითებს, რომ მის წარმოქმნაში რამდენიმე გეოლოგიური პროცესი მონაწილეობს; ერთ-ერთი მათგანია ცხელი წყლის ურთიერთქმედება მაგნეტიტთან — მინერალთან, რომელიც რკინის მადნის შემადგენელი ნაწილია.

კვლევები აჩვენებს, რომ მაგნეტიტის საბადოები დასავლეთ ავსტრალიის ქვეშ ფართოდ არის გავრცელებული. ახალ კვლევაში ედიტ კოუენის უნივერსიტეტის გუნდმა ყურადღება გაამახვილა იმის შეფასებაზე, თუ რამდენი წყალბადი შეიძლება უკვე იყოს იქ და რამდენის წარმოება შეიძლება მომავალში.

შედეგები გამოქვეყნდა International Journal of Hydrogen Energy-ში და, გუნდის განცხადებით, მეტად იმედისმომცემია: მეცნიერებმა უფრო სრულყოფილად გაიგეს ის გეოლოგიური ფაქტორები, რომლებიც განსაზღვრავს, რამდენი წყალბადის წარმოქმნა შეუძლია მაგნეტიტს. კვლევის თანაავტორის, ედიტ კოუენის უნივერსიტეტის ქიმიური ინჟინრის, ალიზერ ქეშავარზის თქმით, ავსტრალიას შეიძლება კოლოსალური, თუმცა ჯერ აუთვისებელი ენერგეტიკული მარაგები ჰქონდეს — უფრო მეტიც, მისი პოტენციალი უზარმაზარია.

გარდა ამისა, მიიჩნევა, რომ ავსტრალიის ქვეშ დამალული წყალბადის მარაგები საკმარისი იქნება ქვეყნის მოთხოვნილებების დასაკმაყოფილებლად მრავალი თაობის განმავლობაში. ამასთან, ავსტრალია შესაძლოა მთელი პლანეტისთვის სუფთა ენერგიის მთავარი ექსპორტიორი გახდეს.

აღსანიშნავია, რომ კვლევის დროს მეცნიერებს წყალბადის მოსაძიებლად ჭაბურღილები არ გაუბურღავთ. ამის ნაცვლად, მათ ლაბორატორიულ პირობებში გაიმეორეს ის რეაქციები, რომლებიც წყლისა და მაგნეტიტის მაღალი წნევის პირობებში, 200 °C ტემპერატურაზე, 60 დღის განმავლობაში ურთიერთქმედებისას მიმდინარეობს. ამ პირობებმა მიწისქვეშა გარემოს ნაწილობრივი სიმულაცია მოახდინა: შედეგად, მეცნიერებმა არა მხოლოდ დააფიქსირეს წყალბადის გამოყოფა, არამედ დაადგინეს, რომ მაგნეტიტის ფხვნილი მასის ერთეულზე მნიშვნელოვნად მეტ წყალბადს წარმოქმნის, ვიდრე მინერალის მყარი ნიმუში. მონაცემები მიუთითებს, რომ აირის გამოსავლიანობა მასალის თითო გრამზე დაახლოებით ხუთჯერ მაღალი იყო.

მიუხედავად ამისა, რკინის მადნის ასეთ საბადოებში წყალბადის აღმოჩენის, წარმოებისა და მოპოვების გზაზე მნიშვნელოვანი გამოწვევები კვლავ რჩება. თუმცა მეცნიერები მიიჩნევენ, რომ ახალი აღმოჩენა მნიშვნელოვანი წინგადადგმული ნაბიჯია იმის გასაგებად, თუ რამდენი წყალბადის გამოყოფა შეუძლია მაგნეტიტს და მისი მიღების ყველაზე ეფექტური გზების მოსაძიებლად.